Responsoria in Parasceve, MH 277

Responsorio per coro e organo

Musica: Michael Haydn (1737 - 1806)

In Nocturno primo

Omnes amici mei - Moderato assai
Velum templi scissum est - Moderato
Vinea mea electa - Moderato

In Nocturno secundo

Tamquam ad latronem - Moderato
Tenebrae factae sunt - Adagio
Animam meam dilectam - Moderato

In Nocturno tertio

Tradiderunt me in manus - Moderato
Jesum tradidit impius - Moderato assai
Caligaverunt oculi - Un poco adagio

Organico: coro misto, organo
Composizione: 4 aprile 1778

Testo

In Nocturno primo:

Omnes amici mei
Omnes amici mei dereliquerunt me, et prævaluerunt insidiantes mihi:
tradidit me, quem diligebam:
Et terribilibus oculis plaga crudeli percutientes, aceto potabant me.

Inter iniquos projecerunt me, et non pepercerunt animæ meæ.

Velum templi
Velum templi scissum est,
Et omnis terra tremuit:
latro de cruce clamabat, dicens:
Memento mei, Domine, dum veneris in regnum tuum.

Petræ scissæ sunt, et monumenta aperta sunt,
et multa corpora sanctorum, qui dormierant, surrexerunt.

Vinea mea electa
Vinea mea electa, ego te plantavi:
Quomodo conversa es in amaritudinem,
ut me crucifigeres, et Barabbam dimitteres?

Sepivi te, et lapides elegi ex te, et ædificavi turrim.
Quomodo conversa es in amaritudinem,
ut me crucifigeres, et Barabbam dimitteres?

In Nocturno secundo:

Tamquam ad latronem
Tamquam ad latronem existis cum gladiis et fustibus comprehendere me:
Quotidie apud vos eram in templo docens, et non me tenuistis:
et ecce flagellatum ducitis ad crucifigendum.

Cumque injecissent manus in Jesu, et tenuissent eum, dixit ad eos.

Tenebrae factae sunt
Tenebræ factæ sunt, dum crucifixissent Jesum Judæi:
et circa horam nonam exclamavit Jesus voce magna:
Deus meus, ut quid me dereliquisti?
Et inclinato capite, emisit spiritum.

Exclamans Jesus voce magna, ait:
Pater, in manus tuas commendo spiritum meum.

Animam meam dilectam
Animam meam dilectam tradidi in manus iniquorum,
et facta est mihi hereditas mea sicut leo in silva:
dedit contra me voces adversarius, dicens:
Congregamini, et properate ad devorandum illum:
posuerunt me in deserto solitudinis, et luxit super me omnis terra:
Quia non est inventus qui me agnosceret, et faceret bene.

Insurrexerunt in me viri absque misericordia, et non pepercerunt animæ meæ.
Quia non est inventus qui me agnosceret, et faceret bene.

In Nocturno tertio:

Tradiderunt me
Tradiderunt me in manus impiorum,
et inter iniquos projecerunt me,
et non pepercerunt animæ meæ:
congregati sunt adversum me fortes:
Et sicut gigantes steterunt contra me.

Alieni insurrexerunt adversum me,
et fortes quæsierunt animam meam.

Jesum tradidit impius
Jesum tradidit impius summis principibus sacerdotum, et senioribus populi:
Petrus autem sequebatur eum a longe, ut videret finem.

Adduxerunt autem eum ad Caipham principem sacerdotum, ubi scribæ et pharisæi convenerant.

Caligaverunt oculi mei
Caligaverunt oculi mei a fletu meo:
quia elongatus est a me, qui consolabatur me:
Videte, omnes populi,
Si est dolor similis sicut dolor meus.

O vos omnes, qui transitis per viam, attendite, et videte.
Si est dolor similis sicut dolor meus.

I testi riportati in questa pagina sono tratti, prevalentemente, da programmi di sala di concerti e sono di proprietà delle Istituzioni o degli Editori riportati in calce alle note.
Ogni successiva diffusione può essere fatta solo previa autorizzazione da richiedere direttamente agli aventi diritto.

Ultimo aggiornamento 16 giugno 2026